आगमन तुझे गणेशा

गगनमंडली ढोल वाजती
आरत्या गाती जलधारा
सुवार्ता तुझ्या आगमनाची
देई निसर्गचि हा सारा

अनंत अमुर्त अणु रेणुन नी
घडवितो तुझी मुर्ती
त्रिखंडची सर्व व्यापूनी जावे
ऐसी तुझी कीर्ती

जळी स्थळी तर कधी पाषाणी
अवतरित तु होसी
चराचरी तुझेचि अस्तित्व
अवघा भरून तु राहसी

तुंदिलतनु तव शरीरावरुनी
सोडिली रुंद शुण्डा
आनंदाचे भरते येइ
पाहता तवरूप हे वक्रतुंडा

चतुःदिशा पसरोनी तुझे बाहु
रक्षण या जगताचे करिती
अर्धोन्मिलित नेत्र तुझे
मग भान मनाचे हरिती

अनंत हस्ते अलंकृत करूनी
तुजवरी भक्तीसुमने उधळली
आगमन तुझे या भुवरी झाले
अन मनज्योती उजळली.

– दर्शन